ហេតុការណ៍នេះបានកើតឡើងកាលពីព្រឹកថ្ងៃទី១ ខែសីហា ឆ្នាំ២០១៩ លើផ្លូវលេខ១៥៩សេ ភូមិគោកអំពិល ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ ។
សមត្ថកិច្ចបានឲ្យដឹងថា សពក្មេងស្រីរងគ្រោះមានឈ្មោះ ព្រឿង គឹមឡាង ភេទស្រី អាយុ១៥ឆ្នាំ មុខរបរសិស្ស ស្នាក់នៅភូមិគោកពន្លៃ ឃុំចំណោម ស្រុកមង្គលបូរី ខេត្តបន្ទាយមានជ័យ ។ ចំណែកអ្នកបើកបររថយន្តចុះគេចខ្លួនបាត់។
តាមប្រភពព័ត៌មានបានឲ្យដឹងថា ករណីនេះកើតឡើង រវាងម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០១២ ពាក់ស្លាកលេខ 1N-6225 ជិះដោយក្មេងស្រីរងគ្រោះ បានធ្វើដំណើរពីកើតទៅលិច តាមបណ្តោយផ្លូវជាតិលេខ១៥៩សេ លុះមកដល់ចំណុចកើតហេតុ បានបើកឡើងជែង និងរថយន្តមួយគ្រឿង មិនស្គាល់ម៉ាក ដែលធ្វើដំណើរស្របទិសគ្នា តែវ៉ាមិនផុត ក៏ទាក់ដៃម៉ូតូដួល ទៅចូលនិងរថយន្តមួយគ្រឿងម៉ាកលុចស៊ីស RX300 ពណ៌ស ពាក់ស្លាកលេខ បន្ទាយមានជ័យ 2B-5659 ដែលកំពុងបើកបរបញ្ច្រាសទិសគ្នា បណ្តាលឲ្យខ្ទាតអ្នកជិះម៉ូតូទៅលើផ្លូវ ត្រូវរថយន្តមួយគ្រឿងទៀតមិនចាំម៉ាក កិនចំក្បាល បណ្តាលឲ្យស្លាប់យ៉ាងអាណោចអាធ័មតែម្តង រួចរថយន្តបើកគេចខ្លួនបាត់ ។
ក្រោយកើតហេតុ សមត្ថកិច្ចបានចុះមកធ្វើការវាស់វែង យកវត្ថុតាងទៅរក្សាទុករង់ចាំដោះស្រាយគ្នាពេលក្រោយតាមច្បាប់បន្តទៀត និងប្រគល់សពឲ្យសាច់ញាតិធ្វើបុណ្យតាមប្រពៃណី៕
