ករណីមន្ត្រីប៉េអឹម ជិះម៉ូតូបុកសត្វឆ្កែស្លាប់នេះ បានកើតឡើង កាលពីវេលាម៉ោង១៤និង៥០នាទីរសៀលថ្ងៃទី០១ ខែកក្កដា ឆ្នាំ២០១៩ ស្ថិតតាមបណ្តោយផ្លូវជាតិលេខ១ ចន្លោះគីឡូម៉ែត្រ ១៤២-១៤៣ ក្នុងភូមិដើមពោធិ ឃុំស្វាយតាយាន ស្រុកកំពង់រោទិ៍។
ជនរងគ្រោះដែលស្លាប់ក្នុងហេតុការណ៍នេះ មានឈ្មោះគង់ ឆែល ភេទប្រុស អាយុ៥៣ឆ្នាំ ជាមន្ត្រីកងរាជអាវុធហត្ថ មានឋានៈជាមេបញ្ជាការរងស្រុកចន្ទ្រា រស់នៅភូមិពោធិ ឃុំមេស ថ្ងក ស្រុកចន្ទ្រា ។ ជនរងគ្រោះ បើកម៉ូតូម៉ាកហុងដា ឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ស្លាកលេខ ស្វាយរៀង ១H -៦៦៧០ ។
ប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញជនរងគ្រោះជិះម៉ូតូធ្វើដំណើរតាមបណ្តោយផ្លូវខាងលើក្នុងទិសដៅពីលិចទៅកើត លុះមកដល់ចំណុចកើតហេតុខាងលើមិនចាប់អារម្មណ៍ ស្រាប់តែមានសត្វឆ្កែ១ក្បាលរត់កាត់ផ្លូវវឹង ធ្វើឲ្យបុរសរងគ្រោះជាន់ហ្វ្រាំងម៉ូតូឈប់មិនទាន់ ក៏បានបុកសត្វឆ្កែ បណ្តាលឲ្យម៉ូតូ ហើយជនរងគ្រោះបោកក្បាលជាមួយថ្នល់ស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័ម។
មន្ត្រីប៉េអឹមស្រុកចន្ទ្រា បញ្ជាក់ថា ជនរងគ្រោះបានឡើងមកប្រជុំនៅខេត្ត ហើយខណៈដែលបើកម៉ូតូត្រឡប់ទៅវិញ ក៏ជួបគ្រោះចរាចរណ៍ស្លាប់បាត់បង់ជីវិតតែម្តង៕
