អគ្គីភ័យឆេះឃ្លាំងស្តុកខោអាវជជុះ តាំងពីកណ្ដាលយប់ ដល់ម៉ោង៦ព្រឹក មិនរលត់ ខូចខាតទ្រព្យសម្បត្តិរាប់ម៉ឺនដុល្លារ….

ក្រោយកើតហេតុ សមត្ថកិច្ចបានចេញរថយន្តពន្លត់អគ្គីភ័យអន្តរាគមន៍ភ្លាមៗ តែដោយសារតែផ្លូវចូលតូចចង្អៀត ពិបាកក្នុងការបាញ់ពន្លត់ ទើបធ្វើឲ្យភ្លើងកាន់តែឆេះខ្លាំងរាលដាល់ដល់ឃ្លាំងជាប់គ្នាទៀត ដែលមានទីតាំងជាប់គ្នា សុទ្ធតែជាឃ្លាំងស្តុកខោអាវជជុះជាច្រើនផងដែរ រហូតមកទល់ម៉ោង៦ព្រឹកនេះ ភ្លើងមិនទាន់អាចគ្រប់គ្រង បាននៅឡើយទេ ខណៈដែលកម្លាំងការិយាល័យបង្ការ និងពន្លត់អគ្គីភ័យរាជធានីភ្នំពេញ កំពុងប្រមូលកម្លាំងបន្ថែមដើម្បីចេញជួយអន្តរាគមន៍។

ក្នុងប្រតិបត្តិការបង្ការគ្រោះអគ្គីភ័យខាងលើនេះ កម្លាំងសមត្ថកិច្ច និងក្រុមពន្លត់អគ្គីភ័យ ពិបាកធ្វើការអន្តរាគមន៍បាញ់ពន្លត់ខ្លាំងណាស់ ដោយសារច្រកចេញចូលតូចពេក ហើយសមត្ថកិច្ចបានប្រើប្រាស់រថយន្តពន្លត់អគ្គីភ័យជាច្រើនគ្រឿង រួមមាន៖ រថយន្តពន្លត់អគ្គីភ័យអគ្គស្នងការនគរបាលជាតិ, រថយន្តពន្លត់អគ្គីភ័យ ស្នងការដ្ឋាននគរបាលរាជធានីភ្នំពេញ , រថយន្តពន្លត់អគ្គីភ័យការិយាល័យអគ្គីភ័យ រាជធានីភ្នំពេញ ,រថយន្តពន្លត់អគ្គីភ័យក្រសួងមហាផ្ទៃ ,រថយន្តពន្លត់អគ្គីភ័យ ទីក្រុងជ្រោយចង្វារ , រថយន្តពន្លត់អគ្គីភ័យទីក្រុងកោះពេជ្រ, រថយន្តពន្លត់អគ្គីភ័យកងរាជអាវុធហត្ថ រាជធានីភ្នំពេញ , រថយន្តពន្លត់អគ្គីភ័យរបស់ ក្រុមហ៊ុនស្រាបៀរកម្ពុជា និងរថយន្តពន្លត់អគ្គីភ័យនៅតាមបណ្ដាខណ្ឌនានា ចេញមកសហការគ្នាបាញ់ពន្លត់ តែមិនទាន់គ្រប់គ្រង ស្ថានការណ៍បាននៅឡើយទេ។

សមត្ថកិច្ចបញ្ជាក់ថា សម្ភារៈដែលនៅខាងក្នុងឃ្លាំងខាងលើ រួមទាំងផ្ទះរបស់ប្រជាពលរដ្ឋកំពុងត្រូវបានភ្លើងលេបត្របាក់បន្តបន្ទាប់គ្នា ហើយទំហំនៃការខូតខាត មិនទាន់អាចកំណត់បាននៅឡើយ តែយ៉ាងណា មិនតិចម៉ឺនដុល្លារ ចំណែកមូលហេតុបង្កឲ្យកើតគ្រោះអគ្គីភ័យនេះ ក៏មិនទាន់ដឹងដូចគ្នា ដោយកម្លាំងសមត្ថកិច្ចកំពុងតែដុតដៃដុតជើងបាញ់ទឹកពន្លត់អគ្គីភ័យសិន ទើបធ្វើការស្រាវជ្រាវរកមូលហេតុជាក្រោយ៕