ភ្នំពេញ៖ យុវជនម្នាក់ ជិះម៉ូតូមួយគ្រឿងលឿនដូចហោះក៏រេចង្កូតទៅបុករបាំងថ្មពុះចែកទ្រូងផ្លូវ បណ្ដោលអោយបោកក្បាលស្លាប់ភ្លាមៗនៅកន្លែងកើតហេតុ ស្ថិតនៅតាមបណ្ដោយផ្លូវជាតិលេខ ៥ ក្នុងសង្កាត់ទួលសង្កែ ១ ខណ្ឌឬស្សីកែវរាជធានីភ្នំពេញ នាវេលាម៉ោង ១២នឹង០០នាទីឈានចូលថ្ងៃទី៤ ខែមិថុនា ឆ្នាំ២០១៩ ។
យោងតាមប្រភពព័ត៌មានពីបងប្អូនប្រជាពលរដ្ឋដែលនៅកន្លែងកើតហេតុបានប្រាប់ឲ្យដឹងថា មុនពេលកើតហេតុគេបានឃើញបុរសម្នាក់ជិះម៉ូតូឌ្រីមសង់ស៊េរីឆ្នាំ ០១៨ ខ្មៅ ១ គ្រឿង ដែលពាក់ស្លាកលេខ ភ្នំពេញ 1GV 6384 បានទៅទិញបាយឆាមួយកន្លែងរួចក៏បន្តដំណើរជិះម៉ូតូពីជើងទៅត្បូងនៅតាមបណ្ដោយផ្លូវជាតិលេខ ៥ លុះមកដល់ត្រង់ចំណុចកើតហេតុក៏រេចង្កូតទៅបុករបាំងថ្មពុះចែកទ្រូងផ្លូវបណ្ដោលឲ្យបោកក្បាលស្លាប់ភ្លាមៗនៅកន្លែងកើតហេតុ។
យុវជនខាងលើដែលបានស្លាប់បាត់បង់អាយុជីវិតនោះគឺមានឈ្មោះ សម្បត្តិ ច៍ន្ទ បញ្ញា គឺជាសិស្សដែលមានអាយុ ២០ ឆ្នាំជាង ស្នាក់នៅខណ្ឌឬស្សីកែវ ។
ក្រោយពេលកើតហេតុសមត្ថកិច្ចចុះមកដល់ទីតាំងកន្លែងកើតហេតុ បានធ្វើការវាស់វែងរួចប្រគល់សពទៅឲ្យបងប្អូនដើម្បីយកទៅធ្វើបុណ្យនៅវត្តអ៊ុតសុរាវត្តី តាមប្រពៃណី ៕
