ហេតុការណ៍នេះកើតឡើងកាលពីរសៀលថ្ងៃទី៣ ខែមិថុនា ឆ្នាំ២០១៩ ចំណុចផ្លូវលេខ១៥៤ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
ប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តម៉ាក LEXUS RX 350 ពណ៌ខ្មៅ ពាក់ស្លាកលេខ ភ្នំពេញ 2AW-4332 បើកបរដោយបុរសជនជាតិចិន ឈ្មោះ អៅ មីង អាយុ៣០ឆ្នាំ ទៅបុករ៉ឺម៉កកង់បីមួយគ្រឿង បណ្តាលឲ្យបុរសម្នាក់របួសធ្ងន់ ហើយព្យាយាមបើករត់គេច តែភ្លាមនោះកម្លាំងសមត្ថកិច្ចដេញឃាត់ខ្លួនជនបង្កភ្លាមៗ និងធ្វើការត្រួតពិនិត្យ ឃើញនៅក្នុងរថយន្តរបស់ជនបង្កមានកាបូបយួរមួយ ។ ក្នុងនោះមានកញ្ចប់កាហ្វេចំនួន៦ដុំ ដោយមានការសង្ស័យ សមត្ថកិច្ចបានហែកមើល ស្រាប់តែឃើញមានថ្នាំគ្រាប់ពណ៌ទឹកសមុទ្រ រូបតុក្កតា សញ្ញាក្បាលខ្មោចច្រើនគ្រាប់ សង្ស័យជាសារធាតុញៀន ទើបសហការជាមួយការិយាល័យប្រឆាំងគ្រឿងញៀនដើម្បីធ្វើតេស្ត និងជាលទ្ធផលបង្ហាញអោយឃើញថា ជាថ្នាំញៀនប្រភេទ M.A /M.D (អិចស្រ្តាស៊ី) ថ្នាំគ្រវី ទៅបន្តធ្វើការឆែកឆេរដល់ផ្ទះជនសង្ស័យក្នុងខណ្ឌច្បារអំពៅ សរុបរួម គឺដកហូតថ្នាំញៀនប្រភេទអិចស្តាស៊ីចំនួន ១១,៦៨០គ្រាប់ ទម្ងន់ជាង៦គីឡូក្រាម បញ្ជូនទៅកាន់ការិយាល័យជំនាញចាត់ការតាមច្បាប់បន្តទៀត៕
