(ភ្នំពេញ)៖ នៅវេលាម៉ោង ១០:៣០នាទី ព្រឹកថ្ងៃទី២៨ ខែឧសភា ឆ្នាំ២០១៩នេះ គណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា ដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា និង លោកជំទាវ បានអញ្ជើញដល់ សាធារណរដ្ឋសង្គមនិយមវៀតណាម ដោយសុវត្ថិភាព នៅក្នុងដំណើរបំពេញទស្សនៈកិច្ចជាផ្លូវការនិងមិត្តភាព នៅក្នុងប្រទេសវៀតណាម រយៈពេលបីថ្ងៃ ពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០១៩ តបតាមការអញ្ជើញរបស់ លោកស្រី ង្វៀន ធីគីមងិន (NGUYEN THI KIM NGAN) ប្រធានរដ្ឋសភាវៀតណាម។
រដ្ឋសភាសាធារណរដ្ឋ សង្គមនិយមវៀតណាម បានទទួលស្វាគមន៍ គណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា យ៉ាងកក់ក្តៅ នៅ អាកាសយានដ្ឋានអន្តរជាតិ NOI BAI នា ទីក្រុងហាណូយ នាឱកាស នោះមាន លោក ង្វៀន វ៉ានហ្សូវ (NGUYEN VAN GIAU) ប្រធានគណៈកម្មាធិការ កិច្ចការបរទេស នៃរដ្ឋសភា សាធារណរដ្ឋសង្គម និយមវៀតណាម លោក ង្វៀន ម៉ាញ់ហុង (NGUYEN MANH HUNG) អនុប្រធាន ខុទ្ទកាល័យ រដ្ឋសភាវៀតណាម មន្រ្តីជាន់ខ្ពស់ រដ្ឋសភាវៀតណាម ជាច្រើនរូបទៀត រួមទាំងលោក ប្រាក់ ងួនហុង ឯកអគ្គរាជទូត នៃព្រះរាជាណា ចក្រកម្ពុជា ប្រចាំនៅ សាធារណរដ្ឋសង្គម និយមវៀតណាម និងមន្រ្តីស្ថានទូតកម្ពុជា ជាច្រើនផងដែរ។
តាមគ្រោង បន្ទាប់ពីអញ្ជើញដល់ ប្រទេសវៀតណាម នៅរសៀលថ្ងៃទី២៨ ឧសភា នេះ សម្តេចប្រធានរដ្ឋសភា និងគណៈប្រតិភូ នឹងជួបសវនាការ និងពិភាក្សាការងារ ទ្វេភាគីជាមួយ លោកស្រី ង្វៀន ធីគីមងិន ប្រធានរដ្ឋសភា វៀតណាម នៅវិមានរដ្ឋសភា វៀតណាម ដើម្បីពង្រឹងពង្រីក កិច្ចសហប្រតិបត្តិការ ប្រទេសទំាងពីរ ពិសេសកិច្ចសហប្រតិបត្តិការ ក្នុងក្របខ័ណ្ឌរដ្ឋសភា និងរដ្ឋសភា ឲ្យបានគ្រប់ជ្រុងជ្រោយ បន្ថែមទៀត៕
